Ռեւմատոլոգիական հիվանդություններ. armeniamedicalcenter.am

«Արմենիա» ԲԿ բժիշկ-ռեւմատոլոգ Գոհար Հակոբյանը ռեւմատոլոգիական հիվանդությունների մասին իր մասնագիտական խորհուրդներն է ներկայացնում: Բժշկուհու խոսքին անհրաժեշտ է հետեւեն ո՛չ միայն հիվանդները, այլ նաեւ մարդիկ, ովքեր չեն բախվել խնդրին: Բժիշկ-ռեւմատոլոգ Գոհար Հակոբյանի խորհուրդները բոլորի համար է:

–   Ո՞վ է ռևմատոլոգը:

–   Ռեւմատոլոգը բժիշկ-թերապեւտ է, ով զբաղվում է այն հիվանդությունների ախտորոշմամբ և բուժմամբ, որոնց ժամանակ տեղի է ունենում շարակցական հյուսվածքի համակարգային ախտահարումներ: Այդ շարքին են պատկանում հատկապես հոդերի ախտահարումով ընթացող հիվանդությունները:

–   Որո՞նք են ռևմատոլոգիական հիվանդությունների առաջացման և զարգացման պատճառները եւ ովքե՞ր են ռիսկային խմբում:

–   Ռեւմատոլոգիական մի շարք հիվանդությունների առաջացման պատճառներն անհայտ են: Կան հիվանդություններ, որոնք անմիջականորեն կապված են ժառանգականության հետ. որքան ծանրաբեռնված է ժառանգականությունը ռևմատալոգիական հիվանդություններով այնքան մեծ է ռևմատալոգիական հիվանդություններով հիվանդանալու հավանականությունը:

–   Ի՞նչ կապ կա եղանակի և ռևմատոլոգիական հիվանդությունների միջև:

–   Ռեւմատոլոգիական հիվանդությունները քրոնիկական բնույթով ընթացող հիվանդություններ են, այդ պատճառով նման հիվանդություններն ունենում են հիվանդության սրացման շրջաններ: Ընդ որում, սրացման շրջանները, սովորաբար, սեզոնային բնույթ են կրում, ուստի եղանակային պայմանների փոփոխություների նկատմամբ կարող են դրսեւորվել բարձր զգայունություն: Օրինակ, արթրիտներով ուղեկցվող հիվանդությունների սրացում առավել ցայտուն դիտվում է հատկապես գարնանը եւ աշնանը:     
  
–   Կապ կա՞, արդյոք, մագնիսական փոթորիկների և ռևմատոլոգիական հիվանդությունների միջև:

–   Ինչպես բոլոր քրոնիկական հիվանդությունների ժամանակ, այնպես էլ ռեւմատոլոգիական հիվանդությունների դեպքում մագնիսական փոթորիների օրերին հիվանդներն առավել զգայուն են եւ, հնարավոր է, հիվանդության սրացում գրանցվեն:

–   Ի՞նչ ախտանշաններով են դրսեւորվում ռևմատոլոգիական հիվանդությունները:

–   Ախտանշանները բազմաթիվ են: Հիմնական գանգատներն են` հոդի ցավ, հոդի շրջանում այտուց, մկանային կարկամություն, մարմնի ջերմաստիճանի բարձրացում, ընդհանուր թուլության զգացում, ախորժակի անկում եւ այլն:  

–   Ի՞նչ հետազոտություններ է նշանակում ռևմատոլոգը:

–   Հիվանդության ճիշտ ախտորոշման համար անհրաժեշտ է կատարել մի շարք հետազոտություններ` արյան ընդհանուր հետազոտություն, ռևմոփորձեր, իմունnոլոգիական հետազոտություններ, ռենտգեն հետազոտություն և այլն:    

               
–   Որո՞նք են ժամանակակից բուժման մոտեցումները:

–   Ռեւմատոլոգիական հիվանդությունների բուժումը հիմնականում դեղորայքային է, բուժում են գլյուկոկորտիկոստերոիդներով, ցիտոստատիկներով եւ բիոլոգիական դեղորայքով, որոնք ընկճում են հիվանդության զարգացմանն ու սրացմանը նպաստող ախտաբանական գործընթացները:

–   Ինչպիսի՞ն է սննդակարգը ռևմատոլոգիական հիվանդությունների ժամանակ:

–   Եթե, օրինակ, ախտորոշվել է պոդագրա, անհրաժեշտ է հատուկ սննդակարգ պահպանել: Այս հիվնադությունը բնորոշ է տղամարդկանց եւ կարող է սրվել յուղոտ սնունդ ընդունելու եւ ալկոհոլը չարաշահելու դեպքում: Նման հիվանդներին հակացուցված է լոբազգիների, ալկոհոլի, տապակած եւ յուղոտ սննդատեսակների օգտագործումը: Օստիոպորոզների եւ արթրիտների ժամանակ սննդակարգը պետք է հագեցած լինի կալցիումով (կաթնամեթերք, ընդդեղեն, քունջութև այլն): Նշված սննդամթերքի հետ անհրաժեշտ է օգտագործել վիտամին D եւ կալցիում: Մնացած դեպքերում հատուկ սննդակարգ չի պահանջվում:

–   Ինչպե՞ս կանխարգել ռևմատոլոգիական հիվանդությունները:

–   Առհասարակ, ռեւմատոլոգիական հիվանդությունները կանխարգելելի չեն: Խնդիրն ավելի շատ կապված է ժառանգականության եւ տարիքային առանձնահատկությունների հետ: Պարզապես պետք է հետեւել ֆիզիկական ակտիվությանը՝ հատկապես 50-ն անց տարիքային խմբի մարդիկ:

Անհրաժեշտ է շատ քայլել, հետեւել մարմնի քաշին. ավելցուկ քաշը օստեոարթրիտի առաջացման նախապայմանն է:

Հարցեր, պատասխաններ, մեկնաբանություններ